Роҳи наҷот аз сил табобати саривақтист
Сил бемории сирояткунанда буда, аз шахси бемор ба одами солим бо роҳи ҳавоӣ мегузарад. Нишонаҳои бемории сил сулфаи давомнокияш зиёда аз ду ҳафта, аксар вақт бо хориҷ кардани балғам, бемадорӣ, камшавии иштиҳо, камшавии вазн, арақкунии шабона ва баландшавии ҳарорати бадан мебошанд. Барангезандаи сил микробактерияи сил мебошад, ки онро “чубчамикроби Кох” меноманд. Он аз шахси бемор ба одами солим бо роҳи ҳавоӣ ҳангоми сулфа ва атса задан, инчунин суҳбатҳои тӯлонӣ аз наздик дар фазои маҳкам мегузарад. Аз ҳама бештар ба сил шушҳо гирифтор мешаванд. Намудҳои сили ғайришушӣ, сили сутунмуҳра, устухон ва буғумҳо, пардаҳои майнаи сар, ғадудҳои ленфатикӣ, гурда ва чашм мебошад.
Тибқи маълумоти Созмони ҷаҳонии беҳдошт аз се як ҳиссаи аҳолии ҷаҳон гирифтори бемории сил мебошад. Ҳарчанд ба рӯйхати сиёҳи давлатҳои ба бемории сил гирифторанд шомил нагардидани кишварҳои Осиёи Марказӣ, аз ҷумла Тоҷикистон, боиси хушҳолист, вале вазъи бемории сил дар ҷумҳурӣ чун дар тамоми ҷумҳуриҳои Осиёи Марказӣ ташвишовар боқӣ мемонад. Як мубталои бемории сили шуши хориҷкунандаи микробактерияи сил дар як сол метавонад, 10-15 нафар шахси солимро сироят кунад. Аз рӯйи таҳлилҳо аз се як нафари мо сироятёфтаи ин беморӣ мебошем. Танҳо 10 фоизи ба сил сироятёфтагон дар давоми ҳаёти худ ба бемории сил гирифтор мешаванд.
Бемории сил се намуд мешавад: силе, ки бемор бори аввал гирифтори он шуд, намуди мутобиқгаштаи сил ва намуди васеи мутобиқгаштаи сил, он намуде, ки солҳои тӯлонӣ бемор табобати нодуруст гирифтааст, тавсияҳои пизишконро иҷро накардааст. Ин гуна шахсон дар зери назорати табибон солҳои тӯлонӣ табобат мегиранд. Шахсони гирифторони ин беморӣ умрбод манбаи беморӣ боқӣ мемонанд. Хушбахтона, гирифторони ин беморӣ дар ҷумҳурии мо хеле каманд. Гурӯҳҳое ба сил гирифтор мешаванд, ки истеъмолкунандагони машрубот ва маводи мухаддир, муҳоҷирони меҳнатӣ, маҳбусон, кормандони тиб, шахсоне, ки бо ВНМО зиндагӣ мекунанд. Сил бемории табабатшаванда буда, ташхис ва табобати он бо доруҳои зиддисилӣ дар кишвари мо ройгон ба роҳ монда шудааст. Табибон бар он назаранд, ки сил бемории табобатшаванда бошад ҳам, аммо худи шахсони гирифтори ин беморӣ аз табобат даст мекашанд. Яке аз омилҳои асосии табобат нагирифтани беморони сил надоштани
маълумот дар бораи ройгон сурат гирифтани табобат ва бепул тақсим шудани дорувориҳо мебошад. Инчунин ба мо зарур аст, ки ҳар шахси ба ин беморӣ гирифтор мешавад, ройгон будани табобати ин бемориро фаҳмонем. Шахси бемор аз гуфтаҳои мо маълумоти дақиқу амиқ оид ба бемории сил пайдо карда, саривақт аз паи табобати беморияш гардад ва боварӣ ҳосил намояд, ки бемории сил табобатшаванда аст.Табобати саривақтии бемории сил беҳтарин воситаи пешгирии ин беморист.
